PAMILIHAN

Balihone marerod di sisin jalan,
pada malomba ngalih dukungan,
bendera partai masih makibaran,
saling tegehin magede-gedean.

Visi-misi calege luung sajan,
apake seken mabukti mani puan?
apa ento tuah janji-janji di tulisan?
di subane menek bisa luntur padidian.

Makejang marebut dadi anggota dewan,
meled dadi pejabat tinggi ngalih tegakan,
pada magarang ngalih jabatan,
magae di kantor pemerintahan.

Lan pilih wakil rakyat ane luungan!
apang i raga tusing nyelsel buin pidan,
eda milih ulian maan pipis ceperan!
eda nyoblos ulian maan persenan!

Dumadak ja antar kayang pamilihan,
ane mapilih mula figur unggulan,
apang tusing figur uluk-ulukan,
ane tuah dot ngalih pipis lebihan.

Puisi Bali

NGALIH SAWITRA
(Terbit @Bali Post, 27 Oktober 2013)

Ngalih timpal ngalih sawitra,
sing perlu bes mabina-bina,
sing perlu milih muani apa lua,
sing perlu milih jele apa darma,
milih ane sugih wiadin tuara,
milih ane di desa apa di kota,
i raga pada-pada jadma manusa,...
i raga sujatine anak manyama,
pakardin Sang Hyang Widhi Wasa,
solah jele lan melah to karma,
yen timpale beler eda musuhina,
nanging ajak menahin laksana,
isin gumine mula rwa bineda,
jele melah pasti mulih ka sema

Puisi Bali

KENYEM
(Terbit @Bali Post, 10-11-13)

Yadiastun kulit i raga selem,
nanging bule-bulene demen,
ulian iraga setata makenyem,
makenyem baan keneh demen.

Kenyem lascarya ane i pidan suba kelem,
kenyem manis maganti dadi kenyem masem,...
i pidan i raga polos lan kalem-kalem,
ane jani suba pada masebeng serem.

Tan pakenyem idupe karasa surem,
tan pakenyem ajak nyama bisa saling antem,
sing taen makenyem bisa ngae gelem,
sing taen makenyem enggal mati matanem.

Puisi Bali

JOMBLO
Terbit @Bali Post, 1 Desember 2013

Nyalanin idup padidi rasane suba makelo,
timpal-timpale nyambat tiang jomblo,
Apa mirib ulian jeneng tiange bas bodo?
Apa mirib ulian gaya tiange sing maco?

Awak tiange sing misi tato,
tiang masih sing pati ngroko,...
Apa ke ulian makejang ento...
dewek tiange sing kanggo...?

Umur tiange suba ngancan wayah,
kanti jani tunangan sing ngelah,
kenehe suba dot enggal ngelah somah,
apang ada ajak jumah peteng lemah...

Tiang pepes pesan marasa cemburu,
nepukin timpal-timpale pada macumbu,
ento makada sing taen pesu malam minggu,
kanggoang tiang bengong padidi di kubu...

Yadiastun jomblo tiang sing ja ragu,
tiang ngelah tresna ane sing guyu,
tiang pasti lakar payu pasti lakar laku,
yen suba galahne jodohe pasti katemu...

NGADEP TANAH (Terbit @Bali Post, 29 September 2013)

Jadmane suba ngancan ngendah,
mirib ulian jamane kaliwat wayah,
laksana kaon ngalahang ane melah,
nagih idup aluh ngalihne ulian elah.

Tusing perlu magae apang ngelah,
ngalih pipis ulian ngadep tanah,
saka bedik tanah leluhure telah,
prajani sugih idup setata bungah.

Pipise kanggo majudi mamunyah,
majudi mabotoh pamuputne kalah,
mamunyah masih ngae utah-utah,
bas ngulurin indria kaliwat layah.

Tusing ja luung baan ngaba solah,
kaliwat momo sugihe ulian corah,
pipisne telah idupne lakar benyah,
karma palane pasti lakar kabayah.

MALAJAH @Bali Post, 25 Agustus 2013

Dadi murid slegang masekolah,
yen mahasiswa rajinang kuliah,
jemetang mamaca lan malajah,
SPP'ne ingetan nyen bayah,
pang enggal maan ijazah,
ngidih pis eda anggona mamunyah,
nyanan payu telah pesu utah,
to ngaenang masa depane benyah.

MEME @Bali Post, 25 Agustus 2013

Meme lan bapa masanding,
malarapan tresnane ening,
i meme ngadut beling,
sia bulan tan patanding,
iraga lekad mabekel eling,
belog makada tan uning,
tan degeng makada manying,
mogi rahayu lan bagia madamping.

BAGIA @Bali Post, 25 Agustus 2013

Bagia punika rasa,
rasa liang ring angga,
rasa girang ring ati,
rasa manahe santi.

Dija ke ngrereh bagia?
Wenten ke anak ngadol bagia?

Bagia punika nenten meweh,
bagia punika tan perlu rereh,
bagia sangkaning iraga,
iraga sane ngmetuang bagia.

Lacur kalawan sugih,
saking alit kantos kelih,
prasida bagia maka sami,
yening setata eling Hyang widhi.

BURUH @Bali Post, 4 Agustus 2013

Nasibe mula tusing patuh,

Minab ene suba pituduh,

Jani tuah dadi buruh,

Tusing pesan dadi ngeluh.

Gae tusing ada ane aluh,

Makejang pasti tuyuh,

Ngalih pipis apang mapunduh,

Kuala nyidaang naar bubuh.

Uli kangin kanti ba dauh,

Buin ujanan buin majemuh,

Awake telah pesu peluh,

Kanti sirahe ngmasin puruh.

Jani kenehe nyansan inguh,

Ulian maburuh sing maan anak luh,

Minab pipise anggona sasuluh,

Pipis mula ngae anake buduh.

 

CUPAK

Yen tolih uli awak,
kena baan nebak,
awakne gede bawak,
bokne barak,
sebengne galak,
ento ba I cupak.

Liunan daya kuangan tindak,
ajak idup irit tusing nyak,
ada gae sing nyak nyemak,
sakancan dedaaran kapakpak,
sepanan ciplak-ciplak,
tusing jejeh sukak.

Solahne mula ngaprak,
mamunyah nginem arak,
yen sing ada kanggo tuak,
mirib ene tumitisan leak,
keweh pesan nyamane ngajak,
I Grantang tuyuh sebak-sebak.

PUISI BALI

BEK

Jadma di gumine ngancan bek,
Ento makada marasa sumpek,
Iraga idup saling maseksek,
Ngrebut tanah ne kar jekjek.

Liu provokator demen ngubek,
Kenehne suba ngancan kutek,
Cara yehe ane daki puek,
Dayane mula saja berek.

Pangede ba duur ngancan betek,
Pipis rakyate telah kagelek,
Pasemetonane suba sing tekek,
Ngajak nyama bisa saling bejek.

Eda kanti gumine benyah dekdek,
Dharma agamane anggo tetuek,
Manyama braya apang jenek,
Tusing ja dadi saling tebek.

PUISI BALI

ANGKIHAN MAAN NYILIH

Idup matine sing dadi tagih,

aget jani nu angkih-angkih,

angkihane tuah maan nyilih,

mani puan pasti lakar mulih.

Idup apa ne lakar alih?

ngalih lacur apa sugih?

ngalih bagia apa sedih?

ngalih beneh apa pelih?

Yening dadi tiang idih,

mai malaksana ane luih,

apang bagia rahayu kapanggih,

di matine tuah karma ane ngabih.

BUDUH (Terbit @Bali Post, 30 Juni 2013)

Sirahne puruh,
Sesai aduh-aduh,
Kenehne inguh,
Setata marasa tuyuh,
Idupne sing taen aluh,
Kenehne sing nyidang nyujuh,
Tusing inget kangin kauh,
Sakitne sesai kambuh,
Ento ngranayang ia buduh,
Jani di RSJ Bangli mapunduh,
Ajak sameton ane patuh,
Mirib ene mula pituduh.

MUSIM (Terbit @Bali Post, 16 Juni 2013)

Musime nuutin jaman,
Tusing cara ne i pidan,
Cuaca nuutin ketek padewasan,
Panes ujane magiliran,
Nanging jani malenan,
Cuacane jeg madukan,
Jani panes binjep bisa ujan.
To ba ne ngaenang sungkan,
Kebus dingin lan ngengesan.
Mogi kenak sameton sinamian.

Puisi Bali "BALI ORTI" terbit @Bali Post 26 Mei 2013

BALI ORTI 

(Made Suar)

Bali orti,

gatra mabasa Bali,

nyabran redite kajantos,

ring koran Bali Post.

Bali orti,

sarana ngajegang Bali,

ngajegang Aksara lan sastra,

ngajegang seni lan budaya.

Bali orti,

koran krama Bali,

wacen sareng sinamian,

anggen nincapang kawruhan.

Puisi Bali "Purnama" @Bali Post 12 Mei 2013

PURNAMA

(Made Suar)

 

Mangkin rahina Purnama,
muspa laksana utama,
ring pura utawi padma,
kairingin tembang wirama,
ngaturang parama suksma,
dumogi rahayu sami krama...